Fréttabréf frá Fjölni

Kapenguria

Við erum nú flutt til Kapenguria og búin að koma okkur vel fyrir. Fanney sér um kennslu hjá strákunum en ég hef haft umsjón með matvæladreifingunni. Fanney hefur einnig staðið sig vel í að taka á móti gestum sem koma hér á lóðina. Nú um helgina voru gestir frá Tansaníu. Þeir voru á ráðstefnu um þróun biblíuskóla sem Norska kristniboðið styður, hér í austur Afríku. Við vorum 9 á þessari ráðstefnu og var hún mjög góð. Þáttakendur voru frá KBC og 2 biblíuskólum í Tansaníu. Í gær 12.4.2010 lögðu 6 af þeim heim á leið í einum bíl. Þeir lentu í árekstri nálæg tlandamærum Tansaníu. Traktor keyrði inn í hliðina á þeim og bíllinn valt 3 hringi. Einhverjir fengu skurði á höfuðið og einn er líklega brotinn. Þetta hefði getað verið miklu verra og þökkum við Guði fyrir að svo var ekki.

Matvæladreifing

Síðustu matvælunum vardreift í mars. Verkefninu er því að ljúka í þessum mánuði. Það sem við erum að gera í apríl er að dreifa sáðkorni til skjólstæðinganna okkar. Hver skjólstæðingur fær 8 kg. af sáðkorni, það er allt sem við getum gert, því peningarnir eru búnir. Stóra regntímabilið á að vera byrjað. Það hafa komið rigningar en nú hefur verið rúm vika án mikils regns. Vonandi kemur nóg regn til að fólk fái uppskeru. Síðasta ár var mjög erfitt og ég veit ekki hvað gerist ef þetta ár bregst líka. Biðjum því með þeim um að regnið komi í hæfulegu magni og vari nógu lengi fyrir góða uppskeru. Ef það rignir of mikið í einu geta komið flóð sem eyðileggja akra og jafnvel mannslíf. Það hefur verið að gerast á öðrum stöðum í Kenýa.

Nettenging

Ásamt matvæladreifingunni hef ég verið á fundum í Biblíuskólanum og biskupsumdæminu. Það hjálpar mér til að komast inn í starfið og skilja betur hvernig kirkjanstarfar og virkar. Ég hef einnig unnið með framkvæmdastjóra Biblíuskólans að því að nettengja skrifstofunnar og húsin á lóðinni.

Kristniboð

Sá sem sér um kristniboðunarstarfið fyrir hönd kirkjunnar er búinn að skipuleggjaferðir fyrir okkur út í héruðin. Áætlunin nær yfir þetta ár og er gert ráð fyrir að við séum 3 daga á hverjum stað. Við munum fara einu sinni í mánuði til staða sem eru hluti af kristniboðsstarfi kirkjunnar. Í þessum ferðum munum við sjá um kennslu á námskeiði sem heitir TEE, markmiðið er að styðja og byggja upp þá sem eru að starfa sem leiðtogar innan kirkjunnar. Þetta verður fyrsta stóra áskorunin fyrir okkur í tungumálinu þar sem við munum kenna á swahili.

Gripaþjófar

Fyrirum það bil 2 vikum hitti ég Sammy, hann sér um kirkjurnar og kristniboðsstarfiðí Turkana. Turkanahéraðið liggur að Pokothéraðinu. Þegar ég spurði hann út í ástandið í Turkana sagði hann að fyrir 3 dögum hefðu Pokotmenn komið og stolið mörgum gripum. Ég spurði hvort þeir hefðu drepið einhvern. Hann svaraði því játandi sagði að þeir hefðu drepið 5, þar af voru fjórir unglingar og einn fullorðinn. Ungu strákarnir eru oft hirðar og lenda því oft illa út úr þessum árásum. Ég spurði hvort hann hefði þekkt þá sem létust og hvort hann hefði misst einhverja gripi. Hann sagði að þeir sem létust hefðu verið ættingjar og nágrannar. Hann sagði að þeir hefðu tekið 50 geitur sem hann átti. Það voru víst öll dýrin hans, hann á því enga gripi eftir.

Spilling

Það sem ég hef verið að hugsa um á þessum tímum er að á sama tíma og ákveðin héruð í Kenýa líða hungur les ég í fréttum um spillingu. Það eru stórar upphæðir sem hverfa úr menntakerfinu, landbúnaðarráðuneytinu og fleiri stöðum. Þessar upphæðir eru háar og gætu hjálpað mörgum af þeim verst stöddu.

Ég las síðan í 1. kafla Jesaja og fannst það gefa góða skýringu á ástandinu. Það hefur lítið breyst á 2700 árum!

 

¹⁶Þvoið yður!Hreinsið yður!
Fjarlægið illvirki yðar frá augum mínum.
Hættið að gera illt,
¹⁷lærið að gera gott,
leitið réttarins,
hjálpið hinum kúgaða.
Rekið réttar munaðarleysingjans.
Verjið mál ekkjunnar.
¹⁸Komið, vér skulum eigast lög við,
segir Drottinn.
Þó að syndir yðar séu sem skarlat
skulu þær verða hvítar sem mjöll.
Þó að þær séu rauðar sem purpuri
skulu þær verða sem ull.

 
¹⁹Ef þér eruð auðsveipir og hlýðnir
skuluð þér njóta landsins gæða
²⁰en séuð þér óhlýðnir og þrjóskir
verðið þér sverði bitnir.
Munnur Drottins hefur talað það.

Dómur yfir Jerúsalem

²¹Hin trúfastaborg er orðin skækja,
hún sem var full af réttvísi.
Fyrrum bjó réttlæti í henni
en nú morðingjar.
²²Silfur þitt er orðið að sora,
vín þitt blandað vatni.
²³Leiðtogar þínir eru uppreisnarmenn
og lagsmenn þjófa.
Allir eru þeir mútuþægir
og sækjast eftir gjöfum.
Þeir reka ekki réttar munaðarlausra
og málefni ekkjunnar koma ekki fyrir þá.

Jesaja 1:16-23

 

Enorð Guðs lýkur ekki hér. Við eigum von um að þetta muni breytast. Í Opinberunarbókinnistendur.

 

Þá mun hvorki hungra né þyrsta framar og eigimun heldur sól brenna þá né nokkur breyskja vinna þeim mein.

Opinb. 7:16 

Og ég heyrði raust mikla frá hásætinu ersagði: „Sjá, tjaldbúð Guðs er meðal mannanna og hann mun búa hjá þeim og þeirmunu vera fólk hans og Guð sjálfur mun vera hjá þeim, Guð þeirra. ⁴Oghann mun þerra hvert tár af augum þeirra. Og dauðinn mun ekki framar til vera,hvorki harmur né vein né kvöl er framar til. Hið fyrra er farið."

Opinb. 21:3-4 

 

 

Kapenguria,12. apríl 2010

Jón Fjölnir Albertsson

Athugasemdir

[Ásta Bryndís Schram (IP-tala skráð) 14.4.2010 kl. 18:30]

Takk fyrir þessar fréttir, Fjölnir. Við biðjum fyrir rigningu og blessun yfir ykkur í boðunarferðalögunum. Guð veri með fjölskyldunni allri. Bestu kv. til Fanneyjar og strákanna.

[Halldóra Lára Ásgeirsdóttir, 25.4.2010 kl. 16:32]

Sæl kæru vinir!

Dásamlegt að finna bloggið ykkar.

Verið Guð falin!

             Halldóra Ásgeirsdóttir.