Verkefnin í höfn...

Jæja þá erum við hjónakornin búin að sitja sveitt í 4 daga og skrifa 4000 orða verkefni hvor. Þau eru um predikun og sálgæslu. Þetta var gaman en erfitt þar sem ég er með ennisholubólgu og strákarnir frekar þreyttir á þessum skólaverkefnum okkar Fjölla. En núna erum við svo að segja búin og helgin er framundan. Veðrið er yndislegt, sumir nemendur eru í stuttbuxum meira að segja... Við íslendingarnir erum í okkar sokkabuxum og hlýju peysum!

Í kvöld er okkur boðið til Inger Lise og Steinar í mat og við förum öll. Davíð er að vísu í afmælisboði til um 20 en hann verður bara sóttur og settur í háttinn hjá IL og S. Dannsiboy kom heim í gær, eftir páskafrí á Egilsstöðum. Hann var alsæll með veruna þar og hefur jafnvel hugsað sér að verða eftir þar í menntaskólanum þegar við förum til Kenýa....

Ég vona að þið hafið það gott þangað til næst! Guð blessi ykkur ríkulega! Enda á orði dagsins úr Dýrmætara enn Gull:

"Óttast þú Drottin, þér hans heilögu, því að þeir er óttast hann líða engan skort."

Sálm. 34:10

Fannsa pannsa

Hvað skal segja....

Ég er alveg að detta úr þessu bloggi, en vil samt reyna að halda mig við það. Bæði til að bera fréttir til ykkar og halda dagbók um það sem við erum að gera... hefur eiginlega virkað sem mánaðarbók undanfarið...

Ég skellti mér til Íslands þann 31. mars.. ástæðan var að Áróra Eir, systurdóttir mín, var að fermast þann 5. apríl. Athöfnin var í Lágafellskirkju, virkilega góð messa. Ég verð nú að segja að það er gott að koma inní þetta form. Vita hvað gerist næst, taka þátt í messuliðunum og njóta þess að eiga samskipti við Guð og menn. Það voru um 15 börn sem játuðu Jesú Krist sem leiðtoga sinn og vonandi er þetta þá bara byrjunin af trúarlífi þeirra sem fullorðnir einstaklingar, en ekki endapunkturinn á kirkjugöngu þeirra!

Það var yndislegt að hitta alla ættingja og vini mína sem ég hitti. Gott að eiga rólegar stundir með sérstaklega mömmu og pabba. Venjulega þegar við hittumst er svo mikill erill í kringum mig, vegna drengjanna, að við varla náum að klára setningar. Við gátum bara spjallað um allt og ekkert og kúsað okkur. Líka gaman að hitta alla í fermingarveislunni. Fullt af fólki sem ég hef ekki hitt lengi. Svo fór ég út að borða með henni Öldu minni á Sjáfarmarkaðinum. Rosalega góður matur og einstaklega skemmtilegt "selskap" við töluðum og töluðum og töluðum...

Svo um kvöldið þann 5. fór ég til Keflavíkur til að ná í frumburðinn sem var að koma til að fara austur um páskana. Hann verður þar fram á 15. apríl.

Snemma snemma um morguninn þann 6. keyrði pabbi mér svo til Keflavíkur. Þá átti ég L A N G T   ferðalag fyrir höndum.. Fyrst flug til Gardemoen, bið í 4 tíma þar og svo lestarferð í um 5 og hálfann tíma til Kristiansand. Þar hitti ég eiginmanninn og guttana mína ásamt Gulla, bróðir Fjölla, hans komu Trine og 2 börn, Idun Andrea og Jón Stefan. Fjölli og strákarnir höfðu farið þangað á föstudeginum til að hjálpa Gulla að flísaleggja ganginn og pússa upp og búa til baðherbergi. Það var eins og ég hefði ekki hitt drengina mína í nokkur ár, því þeir tóku á móti mér með teikningum, gjöfum og kossum og knúsum. Ég upplifði mig sem sárt saknaðar mömmu og eiginkonu. Góð tilfinning. Davíð Pálmi átti afmæli þennan dag, en hann var sofnaður, þessi elska, en kom uppí um nóttina alsæll yfir því að vera búinn að fá mömmu sína aftur. Við fórum svo daginn eftir uppí skóg með pulsur og marsmellow.. grilluðum pulsurnar og í desert var svo marsmellow klesst með súkkulaði og kexi.. nammi namm. Trine undirbjó þetta allt saman og við áttum æðislega skógarstund saman. Takk Trine!! Á fimmtudeginum fórum við svo í dýragarðinn, sáum alls konar dýr.. ljón, tígrisdýr, gíraffa, sebrahesta, Timon, slöngur og fleira og fleira.. Mjög skemmtilegur dagur. Um kvöldið komu teindó og Steini, bróðir Fjölla og hans kærasta Linda til Kristiansand. Það var rosalega gaman að kynnast henni. Og við áttum mjög góðan tíma saman.

Svo fórum við daginn eftir, eða á Föstudeginum langa heim á leið. Fórum fyrst til Lindesnes, sem er syðsti punktur Noregs. Það er viti og heilmikil saga í sambandi við heimsstyrjöldina. Við rúlluðum svo heim á leið um 16 leitið og vorum komin um 22. Allir ánægðir en þreyttir.

Daginn eftir var veðrið yndislegt og við sátum úti með guttana með nesti og horfðum á þá hjóla og leika sér á hjólabretti og hlaupahjóli. Mjög gaman. Um 17 leitið fylltist allt af lögreglubílum og blaðamönnum. Einhver maður hafði þröngvað sér inn á herbergi eins leigjandans hér við skólann. Fjellhaug legir út herbergi til nemenda við aðra skóla. Maðurinn reyndi að nauðga henni en tókst það ekki sem betur fer. Hann skar hana samt með hnífi í átökunum, en sem betur fer slapp hún tiltölulega ómeidd, bara með 2 - 3 stungur og svo náttúrulega andleg sár. Lögreglan leitaði hans hér með hundi og var heillengi hér. Ekki mjög gaman að svona lagað gerist í nágrenni mans þegar strákarnir hafa verið hér úti að leika sér bara rétt áður.. Svo um kvöldið komu teindó, Steini og Linda í pizzu.

Páskadagurinn rann upp og byrjaði eins og síðustu páskadagar hafa gert. Páskaeggjaleit drengjanna. Þeir skemmtu sér konunglega og eftir að hafa fundið þau var komið sér vel fyrir fyrir framan barnaefnið í sjónvarpinu og namminu skóflað inn. Davíð Pálmi á metið. Rosalega er hann snöggur. Hann var byrjaður á hinna eggjum áður en þeir gátu snúið sér við...

Dagurinn í dag var líka mjög góður. Við byrjuðum rólega, Svenni kom í kaffi og svo hafði okkur verið boðið að mæta í páskaeggjaleit í leikskólanum hans Davíðs.. mikil spenna út af þessu síðustu daga.. Við mættum með þá tvo yngstu og það var byrjað á að finna fullt af litlum eggjum. Svo var farið inn og borðað pizza og hlaup með vanillusósu í desert. Svo var hoppukastali og alls konar dót og endað á leikriti og afhendingu á handbrúðu og nammipoka. Frábærlega skemmtilegt og góð stund fyrir okkur foreldrana að kynnast betur. Þetta er besti leikskóli sem ég hef kynnst.. á þá var ég ekkert óánægð með hina 3...

Jæja gott fólk. Þá hafið þið fengið afdrifum okkar um páskana lýst. Vonandi höfðuð þið gaman af. 

Á morgun erum við Fjölli að byrja á heimaprófi, eða verkefni, sem stendur yfir í tæpa 4 daga. Það verður annaðhvort úr sálgæslu eða predikun.. gaman gaman :-)

Guð blessi ykkur og varðveit!

Langt síðan síðast...

... bæði út af því að það hefur verið mikið að gera og líka út af því að ég vildi minka tölvuveru mína!

Mamma og Pabbi eru í heimsókn, og það er yndislegt að hafa þau. Bæði fyrir okkur fullorðnu og strákana. Við erum ekki búin að gera neitt með þeim, bara drekka kaffi og spjalla og svo eru þau búin að fara hingað og þangað að hitta gamla vini og ættingja. Þau verða til 15. mars ... sem betur fer er ég að fara til Íslands þann 31. mars, til að fara í ferminguna hennar Áróru. Annars held ég að það væri erfiðara að sjá af m+p ..

Daníel er allur að koma til í hnénu. Hann er að fara í endurhæfingu á eftir og ég vona að það gangi vel svo hann hafi möguleika á að spila fótbolta aftur.. Hann er annars mjög brattur í félagslífinu hér á Fjellhaug, er varla heima hjá sér. Það er gott, nema að hann er ekki að hugsa mikið um lærdóminn :-((

Markús er ágætlega hress. Hann er rosalega stífur í öxlunum, sem veldur mér áhyggjum. Hann hefur líka verið að tala um að honum sé svo illt í höfðinu. Hann er að fara til læknis út af þessu, en þið megið alveg biðja fyrir honum.

Salómon er frekar hress. Gengur vel í skólanum held ég (er að fara í viðtal á morgun og fæ þá að vita nákvæmlega) Hann leikur aðeins við stelpurnar hér á svæðinu, en líka við Davíð Pálma. Þeir eru voða sætir saman.

Síðastur en ekki sístur er Davíð Pálmi. ..Hvað get ég sagt um hann?? Hann er ákveðinn (eiginlega bara frekjustampur), fyndinn, lítill :-( krúttíbolla... Hann er svakalega ánægður í skólanum. Er að fara heim með Erle á morgun. Þau eru eins og lítil hjón er mér sagt. Leika, rífast og sættast oft á dag :-)

Við Fjölnir erum á kafi í skólanum. það er svo mikið að lesa að ég kemst varla yfir það. Ég er komin með svo mikla vöðvabólgu að ég þarf að passa mig (þess vegna tölvuveru minnkun) Við erum mjög ánægð með námsefnið: Predikun og Sálgæslu. Það sístefnda er alveg okkar fag. Gott að læra faglega um það sem við höfum svona mikinn áhuga á. Predikunin er líka áhugaverð. Fjölnir er búinn að flytja sína ræðu. Gerði það sl. miðvikudag í bænahúsi á Ski. Honum gekk mjög vel. Talaði útfrá 1. Mós. 12:1-3

Jæja gott fólk.Hvað er annars að frétta af ykkur?? 

Skil ykkur eftir með vers úr Biblíunni sem ég dró úr mannakorninu... Job 2:10

Fannsapannsa og co.

Snjókaffihús...

Í dag settum við upp snjókaffihús til að safna fyrir kristniboðsstarfi í Japan. Markús, Salómon, Davíð og Fjölli gerðu snjóhúsið klárt og Markús og ég sáum um veitingar. Heitt kakó, skólabrauð, snúðar og hveitibollur gerðu lukku og við söfnuðum um 12.800 ISK sem er nokkuð gott fyrir 1 1/2 tíma sölu. Hér eru nokkrar myndir:

 

 

 

 

 

 

 

 

Er ekki lífið yndislegt ??

....jú það er það, og oftast uppgötvar maður það þegar maður gerir einfalda hluti, eða einfaldlega bara er með manneskjum sem manni þykir vænt um.

Dagurinn í dag:

Vaknaði kl 07:50 við Davíð Pálma sem var svangur og vildi súrmjólk með púðursykri.. Ég varð við þeirri beiðni og fór svo að lesa í Biblíunni. lenti á 1. og 2. Pétursbréfi. Gaf mér mikið!

Salómon kom fram um 8:40 og fór beint að horfa á barnaefnið... stoppaði ekki einu sinni til að borða...

Fjölnir vaknaði um 09:00 og eftir smá spjall fórum við að reyna að lesa til að undirbúa okkur fyrir verkefnið sem við eigum að skila á föstudaginn.

Um 10:00 setti ég í snúða og skólabrauð til að taka með til Tsega, bekkjasystir okkar Fjölla, þar sem við vorum boðin í mat til hennar kl 15:00.

Um 11:00 vaknaði Markús. Hann fór í sturtu og bauðst svo til að fara með Salómon og Davíð í Rema 1000 til að kaupa laugardagsnammi... það endaði með því að Fjölli og Saló fóru að gera snjóhús fyrir utan blokkina okkar í snjóskafli og við Markús fórum með Davíð Pálma út í búð að kaupa laugardagsnammi fyrir alla famelíuna.

Ég bakaði snúðana og skólabrauðin, Inger Lise hringdi í mig og bauð okkur að koma og fá okkur kaffi og með því í nýja gallerí/kaffihúsinu þeirra Steinars.

Kl 14:00 vorum við farin og áttum yndislega stund hjá Steinar og Inger Lise. Þangað komu systir hans og maður og Inger Lise diskaði upp vöfflum, snúðum, skólabrauði og gulrótarköku. Góðu kaffi og heitu kakói.

Rúmlega þrjú fórum við til Tsega og hennar drengja Enok og Joel. Þangað komu svo vinur hennar, vinkona og svo var "nokkra daga leigjandi" líka frá Eritríu. Við áttum frábæra stund, spjölluðum og borðuðum á okkur gat. Strákarnir léku sér úti og inni og svo héldum við heim um 19:30.

Þegar heim kom var Daníel að búa sig til að fara í heimsókn til Torstein, Daníel var heima í allan dag aleinn greyið, þar sem hann nennti ekki að koma með... :-((

Davíð var svæfður, Fjölli og strákarnir héldu áfram með sjóhúsið og ég bjó til heitt kakó og fór með það og snúða út í húsið... Læt fylgja myndir af "herligheten"

Þetta er uppskrift af góðum degi!!  og til að kóróna allt saman þá á Aðalbjörg afmæli í dag!!! Til hamingju með daginn góða vinkona!

Knús frá Fanney og strákunum...

 

 

Prófið búið...

Jæja þá erum við búin með prófið og gott er það. Þetta var strembinn undirbúningur og próf. Næsta önn byrjar á mánudaginn og þá er það predikun og sálgæsla. Það verður gaman!

Strákarnir eru í vetrarfríi... Markús fór á bretti í dag með skólafélaga sínum og annars hefur liðið verið heima að hafa það náðugt. Daníel fer ekki mikið í öllum þessum snjó á hækjum, en hann er allur að braggast. Aðallega bara leiðinlegt að geta ekki gert neitt skemmtilegt..

Semsagt allt gott af okkur að frétta. Nú koma mamma og pabbi í heimsókn þann 27. og verða til 15. mars. þau ætla að reyna að finna ódýra ferð til sólarlanda ef það hentar innan tímarammans sem þau eru með... það er stundum hægt að fá alveg ótrúlega ódýrar ferðir héðan.. pínu dýrara heim aftur.. en hvað um það

Hafið það gott í kvöld og þangað til næst! Guð blessi ykkur. Ef þið viljið pæla aðeins í próftextanum okkar þá getið þið gert það hér fyrir neðan. Rómverjabréfið 3:21-31   

Frábær texti sem við áttum að túlka í ræmur! Ég skrifaði 13 síður á prófinu.. greyið prófdómarinn

"Réttlátur af trú"

En nú hefur réttlæti Guðs, sem lögmálið og spámennirnir vitna um, verið opinberað án lögmáls.
Það er: Réttlæti Guðs fyrir trú á Jesú Krist öllum þeim til handa, sem trúa. Hér er enginn greinarmunur: Allir hafa syndgað og skortir Guðs dýrð, og þeir réttlætast án verðskuldunar af náð hans fyrir endurlausnina, sem er í Kristi Jesú. Guð setti hann fram, að hann með blóði sínu væri sáttarfórn þeim sem trúa. Þannig sýndi Guð réttlæti sitt, því að hann hafði í umburðarlyndi sínu umborið hinar áður drýgðu syndir, til þess að auglýsa réttlæti sitt á yfirstandandi tíma, að hann sé sjálfur réttlátur og réttlæti þann, sem trúir á Jesú. Hvar er þá hrósunin? Hún er úti lokuð. Með hvaða lögmáli? Verkanna? Nei, heldur með lögmáli trúar. Vér ályktum því, að maðurinn réttlætist af trú án lögmálsverka. "Eða er Guð einungis Guð Gyðinga? Ekki líka heiðingja? Jú, líka heiðingja;" svo sannarlega sem Guð er einn, sem mun réttlæta umskorna menn af trú og óumskorna fyrir trúna. Gjörum vér þá lögmálið að engu með trúnni? Fjarri fer því. Vér staðfestum lögmálið.

 

Fyrirbæn..

Nú ert þú klædd(ur) og kominn á ról
Kristur Jesús veri þitt skjól
Í Guðs óttanum gangi þú
Að ganga í dag svo líkist þú...
....JESÚ

Ekkert smá almennilegt

Í gær var okkur boðið í mat af ungum herramanni sem er í skólanum með okkur. Hann heitir Torstein og hann hefur verið talsvert með okkur síðan í haust. Hann er 24 ára og alveg yndislegur strákur. Á ekki stóra fjölskyldu, eiginlega bara mömmu og 2 móðursystkin ásamt 2 frændsystkinum... Hann kom og eldaði fyrir okkur Tailendskan mat og bauð okkur svo heimabakaða kanilköku í desert... nammi namm. Læt hér fylgja mynd af honum:

 

 

 

 

 

 

 

 

 

 

 Myndar drengur... eins og þið sjáið.

Í dag og út vikuna verðum við Fjölnir á svokölluðu CHED námskeiði. Þetta er einskonar djákna námskeið og ég hlakka rosalega til að taka þátt í því.

Í morgun þegar ég var að lesa fékk ég þessi orð úr sálmi 119 (sem er lengsti sálmur Biblíunnar) Þetta eru vers 129-136 en þið getið slegið upp í Biblíunni og lesið lengra ef þið viljið ... frábær lestur!

"Reglur þínar eru dásamlegar, þess vegna heldur sál mín þær.
Útskýring orðs þíns upplýsir, gjörir fávísa vitra.
Ég opna munninn af ílöngun, því ég þrái boð þín.
Snú þér til mín og ver mér náðugur, eins og ákveðið er þeim er elska nafn þitt.
Gjör skref mín örugg með fyrirheiti þínu og lát ekkert ranglæti drottna yfir mér.
Leys mig undan kúgun manna, að ég megi varðveita fyrirmæli þín.
Lát ásjónu þína lýsa yfir þjón þinn og kenn mér lög þín.
Augu mín fljóta í tárum, af því að menn varðveita eigi lögmál þitt."

 Ég vona að þið eigið yndislegan dag. Lítið upp til Guðs og andvarpið ef þið þarfnist hjálpar!!

...jæja...

Þá er komin ný vika.. reyndar byrjaði hún í gær.. en ný skólavika allavega!

Við byrjum með látum, eins og fyrri daginn, allir út úr húsi, nema frúin, fyrir kl 07:45. Klukkan 12 á Daníel að mæta í skoðun vegna hnésins. Klukkan 15:20 kemur Salómon heim með leigubílnum. Þá er að reyna að ná honum til að læra og klukkan 16 er ég með 12-sporin. Klukkan 18:30 er Fjölli með 12-sporin og eftir það er bara að búa til mat, svæfa Davíð og Salómon.... Aðeins að knúsa Markús og fara svo upp til Kínó í kaffiboð.

Ég er búin að setja inn nýjar myndir... Njótið!

Guð blessi ykkur í dag. Læt hér fylgja nokkur orð Páls Postula sem hann skrifaði til söfnuðanna í Róm. Þetta á alveg eins við fyrir okkur í dag!

Rómverjabréfið - kafli 7, vers 14-25

"Vitað er að lögmálið er andlegt en ég er jarðneskt hold, í greipum syndarinnar. Ég skil ekki hvað ég aðhefst. Það sem ég vil geri ég ekki, hitt sem ég hata, það geri ég. Fyrst ég geri það sem ég vil ekki er ég samþykkur lögmálinu, að það sé gott. En þá er það ekki framar ég sjálfur sem geri þetta heldur syndin sem í mér býr.Ég veit að ekki býr neitt gott í mér, það er í spilltu eðli mínu. Að vilja veitist mér auðvelt en mig skortir alla getu til góðs. Hið góða, sem ég vil, geri ég ekki en hið vonda, sem ég vil ekki, það geri ég. En ef ég geri það sem ég vil ekki, þá er það ekki lengur ég sjálfur sem framkvæmi það heldur syndin sem í mér býr.
Þannig reynist mér það sem regla að þótt ég vilji gera hið góða er hið illa mér tamast. Í hjarta mínu hef ég mætur á lögmáli Guðs en ég sé annað lögmál í limum mínum og það stríðir gegn lögmáli hugar míns, hertekur mig undir lögmál syndarinnar í limum mínum.
Ég aumur maður! Hver frelsar mig frá þessum dauðans líkama? Guði sé lof að Jesús Kristur, Drottinn vor, frelsar. En sem sagt: Sjálfur þjóna ég lögmáli Guðs með huga mínum en lögmáli syndarinnar með ytri gjörðum."

Sálmur 61

Datt í hug að þegar ég ég er að glíma við sjálfa mig í samskiptum við aðra.... ekki síst unglinginn minn. Þá er gott að biðja þessa bæn Davíðs. Þetta eru kannski svolítið stærri orð sem Davíð notar til að lýsa hugarástandi sínu, en þau allavega dekka alveg erfiðleika mína í samskiptum við aðra.

 

"Heyr, ó Guð, hróp mitt, gef gaum bæn minni.
Frá endimörkum jarðar hrópa ég til þín, meðan hjarta mitt örmagnast. Hef mig upp á bjarg það, sem mér er of hátt.
Leið mig, því að þú ert orðinn mér hæli, öruggt vígi gegn óvinum.
Lát mig gista í tjaldi þínu um eilífð, leita hælis í skjóli vængja þinna. Sela
Því að þú, ó Guð, hefir heyrt heit mín, þú hefir uppfyllt óskir þeirra er óttast nafn þitt.
Þú munt lengja lífdaga konungs, láta ár hans vara frá kyni til kyns.
Hann skal sitja um eilífð frammi fyrir Guði, lát miskunn og trúfesti varðveita hann.
Þá vil ég lofsyngja nafni þínu um aldur, og efna heit mín dag frá degi".